Senin, 15 Maret 2010

Allahu Akbar

ALLAHUAKBAR, ALLAHUAKBAR, ALLAHUAKBAR

Kaum muslimin dan muslimat sidang jamaah Idul Fitri yang berbahagia, tau toaku saribattang julu agamaku tuni karangnuangan ri karaeng ALLAH SWT.-
Sikamma pammujia ri ALLAH taala ngasegi, karaenna sikontu alanga silollong bonena, karaeng taenaya sampa’juluna, tasanrupa mahallo’na, karaeng tallasa tamate lolo mapulanaya, karaeng allanggere tanabali tongolo, accini tanabali buta, appau karaeng kuasa rita’se’re – se’reya ammpa’jari sikamma nakaerokia ampa’taenai sikamma anu lebaka napa’nia. Ikatte maarenga rupa tau tena erotta, tena kulle massangagali nakaerokampi ALLAH Taala. Iaji karaeng parallu ni somba, ia tonji karaeng wajib ni pa’pala’ tulung maraenganna taena hakna ni somba, tena siratang ni’pala




IYYAKANA BUDHU WAIYYAKANASTAIM
Salawa pabbarisallang majannang laloi makajappuli rinabitta Muhammad, nabbi manggaina ALLAH Taalah, rupa tau pilang nipattampa’na. Ni utusuki ri tompo’na linoa anggerang katojengang, appadongko kala’birang, ampanggajarrangikasalamakkanga, ampakacinikangi panggadakkang labirika, ahklak masunggu.

INNAMA BISTHU LIUTAMMIMA MAHARI MAAKHLAK

“Tena nani utusuki ri tompo’na linoa, massanggali appakabaji ampea, ri sikamma rupa tauna ilalang rangka’na alanga”.
Ri allo malabbairika anne kubuntulu malabbirika naku pakainga batang kalengku umba naki massing anjarreki tappaka angsekeki imanga, ampareppeseki batang kalengta ri ALLAH Taalah.

YAAYYUAHALLASINA AMANU TAKULLAHA HAKKA TUKATHI WALA TAMUTUNNA LILLAH WANTUN MUSLIMUN.

“E…sikamma tau matappaka tampa laloko risitojeng-tojengnna tappa, riolonga tanapa naki moterang”.

Anne kamma nia ngasengmaki battu ritampaka, appadallekangi atinta, siagang batang kalemta, ci’nongna je’ne sambayangta, lannying massing pikiranta kontu langyinna anne anging baribbasaka’ tanaleo susa tana bangkoro salasa. Ikatte ngasengmi anne antama ri golonganna tau salamaka.

YAAYYATUL HANNAFSULMUTMAINNATI IRJII ILARABBIKA RADIATI MARDIATU FADAHULIL FIIBADIHI WADAHULUL JANNA.

E..Sikamma nyawa masannanga, ammotere ngasengmako mange ri karaeng nu sombaya anggerangi ati matangkasa’nu nanu antama ri golonganna tau ni karangnuanga ri ALLAH Taalah.

Anne alloa risikontu bonena linowa ri appaka sulapa, ammaca ngaseng takabbere mappakalompo ri ALLAH Taala, ammaca tahmid mammuji rikaraengna, ammaca tasbih siagang tahlil appallannying mange ri Allahu Taala. sangkamma mami pammerenna bania ri ru’munna sangkontu mami gunturu manggalungua, appabenrong binabba, ampamebbereki lapisi’na buttaya, ampagessongi langi tujua longjo’na, manna anginga tammiri leko kayua tammungkiri, rammangnga ta’lao todong, monconga iranya ammenteng akkajangpuli sannang pippiri appalangngeri takabbere. Iami anne takabbere nabossarrang lila, nalassukang sa’ra ri bawa, nasoso rammang lantang, andakkai moncong tinggi, annurusu ati taccakko ampantamai pa’mai takkacinikang, anggodai kasia takka laherang. Kamma tongi pakkasiatta battu ilalang ri niulunna abba lompoa assolong massaring mamo battu ri ulunna binangaya tamakkulle nitahang, tamakkulle niampa-amppa, annukungngi assulu tena tahang-tahanga ero angkanangi kana pappakalompo ri Allahu Taala.

ALLAHUAKBAR, ALLAHUAKBAR, ALLAHUAKBAR
Malompoi Allah Taalah.
Sabbu’mi ammotere naki pi langgeri pari pa’mai pole naki pidangdang, na nampa ki kasu’mang massing ri kalengta, antekamma galluru’na sa’ra bombang eranganna anne kalimat takabbereka masarro angimbolong battuang tani kana-kana, inaipi ati kutang tala sumere je’ne mata tala ammatti, pa’mai kereapi tana pakairi-iri, kasia ante kammayapi tana pakabeleng-beleng, allanggere takabbere battu tona sipattang tompamappalakkana silalonnaya.
Riwattu kammayami anne nabiasa tamakulle sikali-kalimo se’retau antahangi pammattina je’ne matanna nalanri jaina nuruntu nanawa-nawa.
Ki u’rangi anakta iareka bura’nenta niaka ansommbalangi tallasa’na ri bori maenga iareka niaka attangga dolangang ni iri anging ni pagamappasa ri bombang, ni gulung ri galluru’na je’ne taenaya sandakkanna, tana asseng pa’rasangang napasekaia, ri butta apai sallang latasengke, dinging-dinging pa’maina, abbengkoro nakku, kuring-kuring cinna assicini bija pammankanna manna nasialloja punna tena kullena tallunggallo.
ripassimbangenna tau niyaka ammantang ipantarang bori na u’rangi ammotere pa’rasangang passolongang cera’na, gassing tapakkoro mami annawa-nawai serenna, nakku risaribttanna labbipa ri ruaya anrong tamangnganakkanna, nakanamamo rinyawana.

“Ti’ring kamma anne mae ripa’rasangang masunggua naniya tonja pa’rasangang kamaseku, nakku’ma anne rikampongku, kuring-kuring ri ballakku apa gaukku kanasimbang dolangang”.





ALLAHUAKBAR, ALLAHUAKBAR, ALLAHUAKBAR
Na risesena tu’lampaya ri pa’rasangang nampa na onjo tuka beru nadakkai, coccorang nampa napurusu, attontong tongtonganna, abbarasa taparallakkenna, ammempo kalanna-lannassang nati’risi kanukungna, tana sa’ring tu’guru je’ne matanna nimboi sassa lalang panggeranginna singai sikajallai, tani lawa malla, tani ala siri, tani sikko panggali, tani paganggang tambara napakamma cinna nafsu na pattema-temai.
Ninawa-nawai nani u’rangi tau matenna niyakamo ambokoiki, dinging-dinging pa’maina tau beru ammoterang pakkalabineanna, pace sannami li’wa ana beru nipilaria riangrong tu mangnganakangna, nasaba nikaerokanna arrappungang assicin-cini sita’gala lima sijamataengi, sipala pammoppori, simapaakkang risikamma katalassang lebba laloa, singai sikamaseang ri passimbangenta.
Ammotere ngasengi sikamma panggura’ngi lebba laloa battu tabbayang ribiring mataya taena tahang-tahanganna, nakku sisammbe dinging-dinging pa’mai, maku-maku silebasa taja lacinna nipammopporong.
anjaya rikuburu’na mua-muanna rupanna bialona sa’ranna tuli nia tabbialo, kamma tunia inja natulingkamo rianja.
ALLAHUAKBAR, ALLAHUAKBAR, ALLAHUAKBAR
Na ri sesena tau kukanga / kasi asia maraeng tongi pakkasia’na lannasaki massing annawa-nawai sarenna, simpuing massing anggerang tasikedde-kedde’na pa’risi battu karemae, simpung battu nampa nati’ring nia manjina mappilanasai,nati’ring pa’lappassang nabattu todong appasitinriang rumesa.
kanakaluppai kalenna kukang nanacini sedeng anak-anak sang umuru’na nirurungan riruayatau toana, massing napake pakeang beruna saluara beruna A rannu rannu silellarang paranna anak-anak. Na ia pung kukang ammangtang bawangji riballa’na attowa ri tongtomanganna, anciniki parangnna anak-anak nasaba baju napakea jaimi kekke’na ammulasara bate tampengnna, na tamping irawa sinreki iratea. Nakkuta’nangmo pung kukang ri amma’na, E..ammakku erokku todong kodong amma ammake baju beru sangkamma pakeanna parangku anak-anak, kaki cini’mi antu amma pakeang ku pakea tenamo baji’na, tenamo pammangeanna.nappualimo pun gamma na tanggala ulunna napurusu u’na anakna nana kana E..anakku sannaji parisikku annawa-nawako, rera sannaji nyawaku ero tonja anak ampasalingiko baju beru lommoji erokku na taena kulleku nanikanrea bawang sinampe anak taniaseng inaimi kapang langgantariki. Kattayang mamaki anne pambageang jakkka fittara, na amilika na alleangangi nappakiokang pagandeng alang kanaya na pa’bageang-bageang ri pakkere miskinga. Nakkua’nang mo pole pung kukang, E… ammakku tenaka kullenna kipanginrangganga kamma todong anjo tauna mange. Nappualimo podeng pun gamma. E… anakku kaddeji ingrang alangkana inrang kainrang sisabbu, nibayara sampulu sabbu, inrang 100 sabbu, ni bayara 500 sabbu, apa todong katte anak nani pabbayarrang, kagassingka te’ne silalonaya ni kelllai, nasusa pa’risi ma nannungang nikalimbu. Apaji na ni bokoimo pung ammma ri anakna, ammempo ri paladangna, ampikkiri kalengna, annawa-nawai sarengna ammatti je’ne matanna,napurusu barambangna, nana kanamo ri nyawana.
“Punna kucini tauna nirurungang ri amma’na, gassing mama angkerei je’ne matangku, punna kucini buttaya dinging-dinging pa’maikku, irawami anjo manggeku ammulu wara”
E… Karaeng nia ngasengmi anne atannu mabannang kebo ri kau, addundu pangkulu attayang panggamaseang siagang pammoporo’nu, sungkeang ngasengmi atannu karaeng timunganna mabajika empoanna mate’nea. Anne kamma nia ngasengmaki hadere ri tampa malangnyingga anne ampa’sukkuki bilangganna puasata sibulang sallona.

WALITUKMILLUL IDDDATHA WLITUKABBIRULLAHA ALAMAHADAKUM WALAALLAKUM TASSKURUN

“Apaji nanu pakkalepu bulang rumallanga, nanu passuku bilanganna, siagang apaji naki pakajai takabberetta appakalommpo ri Allah Taalah ri sikamma pa’pijo’jona ri katte, dasi na dasi niajja ri bilangna tau sukkuruna”.

Anne aloa niharanggammaki appuasa, ni parengtammaki A’rannu-rannu. Rannuki angrayakangi allo katarompokkanta. Ia tommi anne alloa, allo si bokointa bulang malabbirika bulang pa’loloso dosaya sibulangki sallona si leporang bulang rumallang angkaukang pakkusiang antahangi sikamma cinna nafasuta, ki tahangi akkaddo mangginunga siagang berhubungan dengan suami isteri appakaramulai ammumba pajjaraka sanggenna su’ruki ilau mata alloa nalanri Allah Taalah, antu puasa lebbaka ki gaukang Allah Taala, ampataangi naiyya tompa sallang lambalasaki.

“Nai-nai tau angaukangi puasaya na lanri iman siagang malla si Allah Taalah, ni pammopporangi antu ri Allah Taala sikamma dosa-dosana”.

MANSAMA RAMADHANA IMANAN WAIKTISABHA GAFIRLAHU MATAKADDAMA MINSAMBHI

Katorompokang lompomaki ikatte tau lebbaka anggaukang puasa si bulang sallona, iami anne allowa pa’rannu-rannuanta, ta’murikam anne muri-muri kaupakkang ammakkalamaki anne kakkala kemerdekaan, kientengan mianne sambayang idul fitriya dengan khusyu dan gembira, insya Allah nabbaalasaki Allah taala pabbalasa ma’llappi-lappi. Na saba jaitongi tau anggaukang puasa ingka tena nanggappa pahala ri puasana, ni passabakki nalanri na pa siballa iji puasana siagang sifat cekkong, sifiat siri ati, sifat tajassus, ancarita ri bokoi paranna tau, nana kana tommo appuasai kalengnna… anne tau kammaya nakana nabbita:

“Alasiapa jaina tau appuasa ingkar epereki pahalana massangali cipuru na turere bawang”.

“Limai passala akkulle allo’lasoki pahala puasata iami antu abballe-balle, ancaritai ka kodiangna paranna tau, appitina sumpah palsu, dan memandang dengan pandangan yang penuh dengan sahwat”.

Lanri kammanami anjo nana bulang rumallanga ajjari tau tappa ampakabellai sipa jekkonga, sipa iri atia, sipa sibakuka, nani pupuk sipa sabbaraka, nani patimbo sipa sarroa assare-sare, nani coppongi sipa jujuruka. katenaja nataena kanreta naki takkaddo, katena tonja nataena je’neta naki tanggining ingka na lanri parenta kibokoi tonji. kialle rapangi tau pakere miskinga, kaikatte bawang sipolong allojaki takkaddo, tanggnginung na battala ni kasia, labbipa tau kasi-asia kasarroi siallo bujur tak kaddo antekammami battala’na kasia’na. Lanri kammanamianjo nani paturungi bulang rumallanga nani parentangki appuasa barang attimboji sifa sarroa sikamaseang ri paranta tau, ikatte tau nisarea kalbbiang ri Allah taalah ambantui tau takkulea, kagassingka ikatte sannang nyawata riballatta akka’do kaddokang baji, na risa’ri ballatta anggarru parrisi napa kamma kacipurrang.

Kaum muslimin dan muslimat jamaa Idil Fitri rahimakumullah.

Ri allo ri bokona sallang Allah Taala sannaki naapakalabbiritta Allah Taala kamma kananna nabbita ilalang ri haddese’na:
Nipasadiangi se’re timungang ilalang ri surunga ni arenga rayyan, tena nantama ri anjo timungganna massanggali tau anggaukanga puasa, na punna antama ngasengmo tau appoasaya ilalanna ni tongko’mi timunganna rayya.

ALLAHUAKBAR, ALLAHUAKBAR, ALLAHUAKBAR

Iaji ikatte tau tenaya anggaukang puasa, epereka gau sambayangta, na taena passabakkang naki bokoi, sassa lalang lompomaki antu, kamanna eroki appuasa si taung si latu-latu ipantarang bulang rumallang tana tarimai antu Allah Taalah, kaupakkampaki sedeng nani rapiakang gau tamnpolea, kaddeji kapang kiasseng ke’nang apai takkibolong ilalang ribulang ruallanga, a’minasaki antu tunggala bulang ajjari ngasengngi bulang rumallang.



LAUTA’LAMU UMMATI MAFI RAMADHANA SYAATINIHING KULLAHA RAMADHANA

“Kaddeji kappang naassangji ummatku apai takkimbolong ilalalng ri bulang rumallanga A’minisai antu tunggala bulang ajjari bulang ru mallang”.

Kaum Muslimin dan Muslimat yang berbahagia
Niangaseng maki anne ri tampaka, massing kipake pakeang beruta, lipa sabbe cura labbatta, songko kalabiranta, talkko ga’gata, sagge bau massing rasanta natinriang minyak-minyak taniaseng maki nibatei inaimi sukku puasana, kerea tommi ganna tarawena, jai zikkiri’na kagassingka attuntaji ammuntulu bulang naki appuasa, labbina appuande mamamki, kagassingka anne alloa ajjari sambayang bungasatta, empo uru-uruta rimasigika, battupi seng Idul Adha labattua, naki assambayang naki angnjo kale masigi. Ka gassingkja saribattang julu agamata sibuki anggarrusuki baca Qur’anna, na ikatte sibuk alleoki domita accaarammeng dobolo lima appatunrung dobolo annang se’re kosong tallu kosong, ka gassingka tauna sibuk ajjikkiri ri kale masigika na ikatte tena todong naki sewa timborowara amminting ceregenta, ammempo ri kale ballatta sidallekang bi’bikanna assiampi inungan sarru’ta, kajaimi kacinikang kapanrakkang na passabbaki anne kabiasang kammaya manggea amparaki anaka, anaka sikapallakki manggea passabakkanna pammolikinna setanga, penggerokinna cinna nafsu. kanaka Allah Taala Ilalang Qu’ang malayingna :

INNAMAL HAMRU WALMAISHIRU WAL’ANSHABHU WAL’AJLAMHU RIJIHZHUN MIN’AMALI ZHAETHAN

“Sitojeng-tojengna antu inung-inungan sarruka annontonga sifat, abbotoro, panggaukang tannaba, kabiasannai setanga nannu bokoi laloi”.





ALLAHUAKBAR, ALLAHUAKBAR, ALLAHUAKBAR, WALILLAH ILHAM
Malompoi Allah Taala, karaeng taena sampa’juluna.
Ilalang ri bulang rumallanga anne nani parenting tongki appasulu zakka pittara, zakka pannangkasi barang-barang battu ri hakna pakkere miskinga, barang-barang niaka ki boli-boli na kirekeng-rekeng jaina niakki hakna pakkere misikinga ilalangna
“Sitojeng-tojengna ilalang ri barang-barang nuballakia kenning niaki antu hakna pakkere misikinga”.

Appasuluka zakka pittara niaki napangtengki Allah Taala Kamma kanangna Allah Taala
“Alle laloi zakka pittara’na sesena kenaning nia pakkullena sollana masing tangkasa ribatang kalengna”.

Zakka lebbaka ki pasulu ajjari bageannami antu tau kasi-asia barang nia tonji nakasia te’nena nikanaya lino, inaimo kapang lambuntui pakkere misikinga punna teami ikatte tau nisarea kalabbiang ri Allah Taala

“INMALLZADAKATI LILLFUKARRAI WALMASAKIR WALAMILINA ALAIHA WALTAUFATI KULUBIHEN WAFILLRIKABE WALAHIRINA WAFIRASULILLAHI WABUNISYABILA FARIDATAN MINALLAHI WALAHU ALIMULL HAKIM”
“Sitojeng-tojengna antu zakka pittara bageannai pakkere misikinga, bageanna tongi amiliki siagang tau bungasaka antama Isilam bageanna tongi tau anginrangnga ri oloanna agamaya siagang niaka ilalang bundu appatojenggi Allah Taala, anne parenta battui ri Allah Taala naiya karaeng sarro adeli na manggasseng”.

Singarami ri passimbanganta angkanaya uru-urua anggappa pa bageang zakka pittara iamiantu misikinga teami amilika ni pakariolo ka mole-molei ni langgere tupupi sibagei amilka na nampa ni u’rangi pakkere miskinga, kukanga.
pakkere misiking, anak kukang kewajiban lompoi ri katte amparautusuki, ampadu’duki, amboyangngi katallassang, angjagai kasalamakkanna, anjagai barang-barangna punna nia, na dosa lompoi ki gappa punna niakki appatolo-toloi pakkere misikinga siagang anaak kukang lappasaka, kipa’risi nyawanna, kialle barang-barangna, angtamakki ri golonganna tau ammballe-ballei agamaya, kamma kanangna Allah Taala ilalang Qur’an malannyingna :

ARAAITALLAZI YUKAZZIBUBIDDINI FAZALIKA’LAZI YADUULYATIM WALA’YAHUDDU ALA TAAMIL MIZKHINA

“Kiasseng kaji tau ammballe-balleia agamaya iamiantu sarroa ampa’risi nyawana anak yatim puatu, siagang tau tenaya assera kanre pakkere misikinga”.

Na ingka punna niakki sarro ansaleori nyawanna pakkere misikinga ki katutui ki ngai anak kukang lappasaka sangkamma kingai kikarimangganna anatta nakana nabbita sipammantangganga ri allo siboko, sanggkamma A’reppese’na karemeng lima tanggana siagang karemeng lima panjokjokna.

haderen wal hadirat jamaah Idul Fitri rahimakumullah
Anne kamma lebba’ maki ampa sakka pittarata, kapunna nampapa naki pasulu ri lebba’na khatteka ammaca khutba passidakka mami antu arengna, tanggakasa’mi antu barang-barangta battu ri hakna pakkere misikinga, tangkasa tommi batang kalengta battu ri sipa sibakuka antu sifa sibakuka sannaki ricallana ri Allah Taala, nani kurisi ri paranta rupa tau

“Tau dermawanga / sarro assare-sare arreppeseki ri Allah Taala, arreppesekki ri parangta tau, nabella ri pepe’na narakaya, natau sibakuka tau tena na sarro A sare-sare arreppesekki ri pepe’na narakaya, bella battu ri Allah Taala, nabella todong ri parangna tau”.

Na lanri zakka pittaraka siagang puasa lebbaka ki gaukang nabellamo jarakta antara tau kalumannyang siagang tau kasi-asi areppese’mo tau lebbaka si kabelleai, assingai tau lebbaka assikurisi massing sunturu’maki singai sikamaseang ri passimbangenta nasi tojeng-tojengna tau labbirika iami antu lompoa tappa’na.

INDHA AKKRAMAKUM INDALLHAI ATKAKUM

Hadirin wal hadirat jamaah Idul Fitri rahimakumullah.
Na ri niattamo anne kamma anggaukangi pa’lappassang pappittarrang rig auk niak selennarang sikamma pakkasiatta, nasabakkimo na tangkasa dosata ri karaeng Allah Taala, apaji na ta’lalo bajikna.
Ilalang anne allo malabbirika, punna tangkasa ri allah Taala, na tangkasa todong ri parangta rupa tau. Anne alloa ni pilemi sipat tannabaya, sifa kodi kero, kodi sammu, sifa sarroa ancaritai ka kodianta parangta tau. Nana kellaki Allah Taala anne alloa sipammopporang dosa leba’lalota ri parangta rupa tau, auleka lebbaki si sala pa’mai sipanggamukang taipa lolo, sipibuanggi rig au takamma, kagassingka passala butta sisingkulu naki sipakkantorang, sidallekang meja, nalanri jangang sikayu, solongang je’ne, besere ana-ana naki sipanaikang ri cappa kayu tinggia, siselanggang riliki taenaya saddakkanna, kumole-molei assigantiroki, siparallakkengaki naki tasipau-pau, ta sale pepe.

ALLAHUAKBAR, ALLAHUAKBAR, ALLAHUAKBAR, WALILLAH ILHAM

Ikatte maarenga anak makkana tau lebba nikimbolong riang-rong mallassukang, nipakolompo ri mangge tumajjariang, tea laloki amma’ring dangku ri tau toa, parallumi kipidandang nata’lalo ia siratanna, liba appala pammopporo risesena ikatte niaka ija angganuang tau toa, angrong kamma tompa mange. kagassingka lebbanggi alangnga kipassiarai, tepumi co’corang ballakakipurusu, palalimaya ki jamataengi nariunaya tau toata kikaluppai.





WAKAFA RABBIKA ILLA TA’BUDU ILLAIYYANU WABIL WALIDAYNI IHHSANNAN
“Lebba naparentaki Allah Taala poro tena naki amaraengannaya ia, naki anggauk bajik lalo ri ruaya tauteanu”.

Ki U’rangi pakkatuo, pammarakai siagang paggatutui panggirimangganna utamana angrong tumallassukanta, kanampapi allili bulang naki sessa kiballassi, pila lompoki ilalang battang pila lompoi tongi kaballassanga napisa’ringi, sanggenna narapi bulang kalassukanta na bilang kalenna empo ri cappa tanru, irawami bangkenna rikalibbong kuburuka sowali. Maeki sedeng riwattunta nalassukang ruwanami kalase’renna, naantalai emangka nasalama, emmangka najammeng lingka rianja, naiyyapa nabilang kalenna salama punna lassukki assulu tamangapa-apa allangere sa’ra anggarru, iyatommi anjo wattua natabbakkasa pa’mainna napela silalonna pa’pisa’ringi simpung Susana, nakaluppai ballasa’ niaka natarangga salapang bulang sallona, layaki ba’lalo takkasambeang siagang rannu te’ne pa’mai, nia inji je’ne mataya ribiring matanna natanna sa’ring kalenna ta’muri nabengo rannu sukkuru ri Allah Taalah nipalappasa ri kasusanga, nani paturungi ana jari tau natanasa’ring akkana ilalang atinna :

“kurru sumanga’na anakku nanu sungkeang bongngko, nanu balasaka te’ne.te’ne kubusu napala, te’ne tanaleo la’ba tana bengkoro salasa”.

Naiyya tossing nikanaya mange tuli napare jama-jamang amnoyangi kanre balanja tu ri balla’na, pa’risiki pa’maina punna tena nasirapi bari’basa na karuenna anakna, tanajampangi posoa, tampadulu mangganga, battu bosi kabosiang, bambang kabambangang napassai bukunna attuju, akkareso sanna, sa’sang napa’lampa sa’ra allo nampa motere, tena maraeng ana jari taunna.
Iaji katte maarenga ana sarro takkaluppaki ripakatuo,pammarakai ruwaya tau toata, ba’lalo niakki lompo, terasa bukunta anggappa doe, na ruaya tau toata dodong takkule giok, teai pa’balasa baji kisareangi tau towata iangka sarro kiga’garaki, kiparenta kitiki, bahkan nia ana napatabai pala’lima tau toana, na subbi bangkengi tau toana, dosa sannami liwa’na ana kammaya anne, kaddeji kapang ero’na pala pabbalasa ballasa’na tau toata, je’ne susu ki’ mu’musuka ri ammatta kamanna sikamma anu kiballakia tangannaki ki pa’bayarran, dosaki ri tau toata dosa tena pammopporo’na punna tena na pammopporangki, anggappaji antu sallang singara ingka singara ingka singara kanjoli, acciniji antu sallang salama ingka salama datang.

AMMA YABBALUANNA INDAKKALKABIRA AWRIRRAHHUM PALLATUKALLIMU PAAWLLATANHAR HUMMA WATI LALA HUMA KAULLAN KARIMANG

“Na punna nia’maki lompo, na iya rua sanna’mi dodongna tea laloko longga bawai, kasara pau mange ri ia, ingka bajiki empoanna, alusu pau-paunnu mange ri tua”.



Nana kana Nabbita :
RIDALAHI RIDALWALIDAINI WASUTULAHI WASUTULI WALLIDAINI
Battuanna :
“Antu rellana Allah Taalah niaki ri rellana ri ruaya tau towata, naantu panggalaroinna Allah Taalah niaki ri panggalarroinna tau toata”.
Ri pannongko anne khutabaku eroka appabattu pappasang nalanre pappasang agama, pappasang tau toa, pappasang adat :
Uru-uruna, Tabe kipammopporang mama ikatte tumappa rentanya tea laloki lanre amboyangi kabajikang tau caddia, naki tea lalo pereki pangganreng tau caddia o… Dende antu tau caddia ma’nassa nipakarioloi pappala’na ri Allahu Taala,apamo gau punna napala-palakkangki ri kakodiaanga, nanabua’-buakki ribibere tau jaia, kipare’ laloi tau jaia umma tumminawang nisibali-bali ampamajui pa’rasanganta.
Kituruki laloi tassikali-kali ampena anrong janganga rianakna, akkerei lapung anrong accakko-cakko abboya kanre, napunna anggapai kanre teai ia riolo angkanyamei, mingka nakurrui anakna nanasuro arre’bo-rebo arannu-rannu angkate’neyangi boya-boyana. Napunna nia bahayalammanraki nacakkoi anakna irawangganna ka’nyi’na, nakalenna anrong attannang andallekangi bahayaya. punna ammarentaki turuki laloi ero’na agamaya, teai ero’na pinggawaya. se’re pammarenta takkullei nagaukang ero’na nammenteng rikatojengangnga.

Pappasang Maka Rua :
Ikatte tossing tumappa’rasanganga, tau jaiya, teaki lanre niparenta kakamma tosengi ero’na adaka, punna nia tumapparenta nia tompa tuni parenta, kassingka nia tasse’re-se’re ri tumappa’rasanganga, napakei akkala’na pulando landopunna narapi pambayarang pajak, nani battui ri pasingara mannassang atunra kapereki mani tani patunra angkana tena doe’na napunna nakio mange akkusiang nakaro-karoi nasikko passapu kebo ulunna, naba labbaki leko-leko. akkanda tassikali-kali appualitani kuta’nang angkana danggalaki ulunna. Anne sipa kammaya tena matu-matunna, baji’mi nisorong boko, tena wassele laki gappa bahkan paccallaji riparanta tau, panggurisi ri tumapparentata labbipari Allahu Taala.
Pappasang Maka Tallu :
Ikatte tau loloa bentennaki antu pa’rasanganga, kijagai kalenta, kapunna panramo nikanayabaine, ma’nassa puara parami pa’rasanganga,napunna jarred tappa’na ma’nassa sannang salewangangi antu pa’rasanganga, teaki ma’ring nataba kana, nakana intang kalenna, caulu tenang nipake ti’ring nisungke najaimo ke’ke’na. Anne jammanga nikana jammang kamajuang tenamo tamaju kamanna kapanrakang majungaseng. Naiyya baine accukkuru tinggi nassaluara bodo, naiyya bajunna alabbi natagannaka, anu siratanga nicakko nipassollerang, anu siratanga nitongko nipakacinikang, nalanri nipinawangi ero’na jammanga, ero’ tommi nikana tau moderen ingka tau abbokoji ri agamaya. Runtungmi bulu saraung, sosara bawa karaeng tuna lele bija pammanakanta, kamaemi kiboli siritta punna assalerangki, riparanta tau. Lanri kammanami anjo kipinawangi ero’na agamaya, kibelo-beloi kalenta ri akhlaku karimah, kipentengi sirika kijagai adaka naikatte parangku tau rungka, kalliki antu ri bai’-bainea, kijaga laloi siri’na, naki katutui batang kalenta, siagang panggaukanta, iapi naki aggappa tau baji punna baji tonggi batangkalenta, punna bura’ne nasomberang kalenna, baine kammatodong sallang lanagappa. Kirapangkai kalenta sa’ri punna sangging baine kipanraki kipa’du’du timboro awwara, bacabaine kituntu, kaborroang kililikang mange-mange, nabaca Qur’anta taki asseng, sambayang allo-allota kibokoi bura’ne patasa. Iapi naki kanaki bura’ne patasa ero’na agamaya kipakariolo, ampa’tojengi agamaya.
Pappasang Maka Appa :
Naikatte ammakku, daengku ibu rumah tanggaya. Issengiangkanaya ikattentu paeng tau angginrajaki salama-lamana, assala kajarianta battuki ribuku rusukna bura’nea, lanrinnami anjo,teaki longga bawai, kasara kana ribure’nenta katungginranjiki padeng. Kajule memang tongi langgere’na punna se’rea baine amparentai bura’nenna. Kaddejji kapang nia tau akkulle nisomba mangaraenganna Allah Taala, mannassa niparentangi antu baine sujju ri bura’nenna. Naikatte tossing daengku, bapakku kepala rumatanggaya, Issengi angkanaya baine nipajjari ribuku rusutta, jari kipareki pengawa; ri sa’rinta , teai buku ulunta nipare jari, lanrinnami anjo teaki atangi buku bangkenta nipare jari-jari teaki atangi, kasipapalli nataba lima nikanaya baine, harrangi nisubbi bangkeng, tena siratang nipajjari ganrang juma. Lanrinnami anjo kibina laloi rumah tanggata siagang baji, penuh kasih saying, nasaba antu rumah tanggaya teai tampa’na pa’borro-borroanga, teai tongi tampa’na tau borroa, ingka passibuntulannai tau tagannaka poro ampaggannaki massing kekuranganta. Kassarro amminasaki antu anjariang anak baji, ansungkeangki bongonta, ambalasakki rikabajikanga anak jari taunta, kisuroangi appilajara agama, kipakajinikangi ampe panggadakkang mabaji. Naiyya nikanaya tau toa ma’nassa anrong gurui ri anana, nanikanaya anak amanah lompoi ri tau toana. Anne kamma jai sikalimi bahaya langgesaraki tappaka,antallanggangi adaka, kapunna riolo panggadakkanna ana-anaka akkulantuki ammalo dallekanna tau toana, anne kama-kamma natarambangmami kulantu’na tau toana, punna dala didikki mannasa anakta tongi lampalesangisiritta. Bunga kodhi anu cu’lana kikattili memangmi rioloang tenana nanaculakiki
Sikammaji anne khutba akkulle kupandalekanggang ridallekang empoang malabbiritta ngaseng dasi-nadasi barang anggerangji matu-matu, naki ajari tau tanggkasa ridosa, naki missing salamalino anjongpa la riallo ribokona Allah Taala. Lekiamaki lino, lasiri pa’rasangang lani pilei lamung-lamung lattimboa.

SALAMAT HARI RAYA IDUL FITRI 1430 H.
Mohon Maaf Lahir Batin. Amin…Amin..Ya..Robbil Alamin

BARRAKALAHULI WALAKUM FILKURANIL HAKIM WANAFA NI WAIYAKUM BAMAFIHI MINALAYATI WALJIKRIL HAKIM AKULU KAULI HAJJA FASTAGFIRRUHUU INNAHU HUWAL GAFURRU ROHIM



KHOTBAH IDUL FITRI








1 SYAWAL 1430 H.